Mizo zirlaite scholarship tur sum MSB-a hlan turin buaipui mek a ni

Kum 2015-16 atana Mizo zirlaite scholarship tur sorkar laipui aṭanga rawn kal chu Mizoram Scholarship Board (MSB) kutah a la lut lo a; Finance department chuan sum hi MSB kuta hlan turin an buaipui mek thu an sawi.

Vanglaini palai zawhna chhangin MSB hotute chuan, scholarship sem chhuak turin theihtawp chhuaha an inbuatsaih thu an sawi a, "Sum kan hmuh hun chuan kan sem thei mai ang. Sum hi kan hmuh thuai theih nan ṭan kan la a, a theih ang angin kan nawr reng a ni. February thla chhung ngeiin sem kan tum," an ti.

MSB hotute sawi danin, scholarship sem chhuak tur hian 98% vel tihfel a ni tawh a, online aṭanga dil mi 1,000 leh online lo ṭanga dil mi 1,000 vel dilna chu chinfel ngai a la awm. Hei bakah hian, mahni account ni lo hmang an awm nual a, chu'ng mite chu an sikul hotute hrilhin, account hran hawng tura tih an ni.

Kalphung thar hman a nih avangin a buaithlak nia sawiin MSB hotute chuan, "Zirlaite account-ah ngei lut tura tih a nih avangin buaipui ngai a tam hle a, Mizoram hi hma la chak ber pawl kan ni zawk," an ti.

Vanglaini palai zawhna chhangin Finance minister Lalsawta chuan, scholarship sum chu MSB hnena hlan turin an buaipui mek tih a sawi a, "Zirlaite chanvo tur hi chu a rang thei ang bera pek chhuah kan tum ṭhin," tiin, state matching share tur pawh pek chhuah tura buaipui mek a nih thu a sawi.