Champhai DC-in ASI hnathawh a en

Archaeological Survey of India (ASI)-in Mizo pipute sûlhnû zir chiang tura Vangchhia-a excavation work hna a kalpui mek chu tun hnai khan Champhai DC Vanlalngaihsaka'n a tlawh a, hnathawh dan a enfiah.

Vanlalngaihsaka chuan, "Archa-eologist-te'n lei hnuaiah eng thilte nge inphûm tih zawng chhuak tura an laih rual hian, hmasang kan pipute hun lai aṭanga kan hnam chanchin kan la hriat kim loh, kan history tichangtlung thei tur inphûmte hai lan a ni dawn a ni," a ti.

ASI assistant superintendent Dr Sujeet chuan, Vangchhiaah hian hna 10% chiah an la thawh thu sawiin, "Hmabak la tam hle mah se, tuna hmuh theih chin ringawt aṭang pawhin hmanlaia mite khan thil hlu chi hrang hrang siam nachang an hria hi thil mak a ni," a ti.

ASI mite hian January 5, 2016 aṭang Vangchhia-ah hna thawk
ṭanin, Kawtchhuah Ropui thlen hma ramhnuai hmun eng emaw zatah hmanlaia mitthi phûmna hmun te, lungrem te, fûr ruahtui tam laia tui luan dan awmze nei taka her kual tura lung chang ker kuakte an hmu chhuak tawh a ni.

Kawtchhuah Ropuia lung phunte pawh engtik lai huna phun nge an nih tih leh, a phuntute hre turin sample-te lain an zir chiang bawk ang.