Kohhran leh CYMA-ten Pathiannia faina beihpui thlak huaihawt an duh lo; Governor hoin faina hnatlang neih a ni
Sorkar laipui ruahmannaa nimin Pathiannia India ram puma faina beihpuithlak huaihawt tura tih chu kohhran hruaitute leh Central YMA-in an duh loh thu thuneitute hnena an thlen hnuah Mizoram sorkar chuan vawiin Thawhṭannia neih turin a sawn. Hetih lai hian, Governor, Chief Secretary leh Aizawl DC-te kaihhruaiin nimin khan Aizawlah faina hnatlang neih a ni.
Prime minister Narendra Modi hmalaknaa ‘Ek Tareekh Ek Ghanta Ek Saath' tih hnuaia India ram puma faina hnatlang buatsaih tura tih chungchang hi Mizoram Kohhran Hruaitute Committee (MKHC) hruaitute chuan September 28, 2023 khan chief minister Zoramthanga an sawipui a; Pathianniah faina hnatlang buatsaih lo tur leh, October 2, Thawhṭanniah emaw sawn turin an ngen.
Central YMA pawhin 'Ek Tareekh Ek Ghanta Ek Saath' chu ṭha an tih rualin, a hun atana ruahman October 1 chu Pathianni, Kristiante ni serh a nih avangin a remchang loa an ngaih thu, September 29, 2023 khan thuchhuah siamin an tarlang.
CYMA chuan, "India ram, sakhaw zalenna rama sakhaw pakhat ni pawimawha hetiang ruahmanna siam a ni hi ṭha kan ti lo a, Kristiante Pathian biakna ní ngaih pawimawh lohnaah kan ngai," an ti a; Pathiannia faina hnatlang huaihawt lo tur leh hun remchang danga huaihawt mai turin Mizoram sorkar an ngen.
UDPA secretary Lalmalsawma Pachuau chuan September 30, Inrinni khan hriattirna (circular) tichhuakin, faina hnatlang huaihawt hun chu October 1 aṭangin October 2-ah sawn a nih thu a tarlang a; hriattirna chu a ṭul anga bawhzui turin UDPA directorate, Aizawl Municipal Corporation, Lunglei Municipal Council leh UDPA officer-te a hriattir a ni.
Lalmalsawma Pachuau chuan, "October 1, 2023 hi Pathianni a nih avangin kohhran member-te tan he ni-ah hian faina beihpui thlak a remchang lo a. Chuvangin, kohhran member-te an tel vek theih nan October 2, 2023-ah faina beihpuithlak hi kalpui tura ruahmanna siam tur a ni," a ti.
UDPA Secretary tarlan danin, India hnampa - Mahatma Gandhi pian champha, October 2 chu India ramah Faina Ni atan hman a ni ṭhin a; kuminah chuan sorkar laipui ruahman angin chawlhkar hnih chhung, September 15 aṭanga October 2 thleng faina chungchangah kawng hrang hrangin hmalak a ni. Sorkar laipui chuan October 1, 2023-ah chawhma dar 10-11 inkarah state tinah faina beihpui thlak turin a ti bawk.
Hetih lai hian, Governor Dr Hari Babu Kambhampati hoin nimin khan Raj Bhavan-a thawkte chuan ‘Ek Tareekh Ek Ghanta Ek Saath’ hun hun hmangin, Raj Bhavan leh MLA Hostel hlui inkara kawngpui tifaiin an hnatlang a; chief secretary Dr Renu Sharma, Aizawl bawrhsap Nazuk Kumar leh AR 23 Sector DIG Brig. Girish Upadhya te hoin Assam Rifles-te chu Lammual leh Dawrpui veng hmun ṭhenkhatte tifaiin an hnatlang.
Sainik School Chhingchhip pawhin nimin khan Gandhi Jayanti pualin Chhingchhip khawchhung leh an sikul chhehvel tihfai hnatlang an nei bawk.