Siahaa sikul tàwp tawh sorkarin ṭanpuina a pek tur zingah a dah
Mizoram Pradesh Congress Committee (MPCC) Media chairman Lalremruata Renthlei chuan, Mizoram sorkarin sikul eng emaw zat dinhmun sang zawka tun hnaia a dah zinga mi Zasai Memorial High School chu sikul awm tawh lo, tàwp tawh a nih thu a sawi.
Tarlan tawh angin, tun hnaia Chief Minister hoa Council of Minister ṭhukhawm chuan Mizorama sikul 263 chu dinhmun sang zawkah a dah a; chu'ng zinga sikul 180 chu sorkar sikul ni turin a dah (provincialise) a, lumpsum grant-in-aid dinhmuna awm mek sikul 52 chu tun hmaa la awm ngai lo provisional adhoc grant-in-aid ah a dah. Sikul 31 chu lumpsum grant-in-aid din hmunah a dah bawk.
MPCC Media hotute'n September 30, Inrinnia Aizawl Press Club-a thuthar thehdarhtute an kawmnaah Lalremruata Renthlei chuan, "Mizoram sorkar Cabinet-in grant-in-aid pe tura a tih Zasai Memorial HS, Siaha hi sikul awm tawh lo a ni a, defunct school (sikul awm tawh lo) a ni," a ti.
Lalremruata Renthlei chuan, Zasai Memorial H/S chu inthlan awm tura Saiha biala MNF candidate tur Lalmalsawma Zasai pa Zasai hriatrengna atana sikul din a nih thu te, kum eng emaw zat kal taa tihtawp tawh a nih thu te, sikul building apartment pawh mimalin chèn nan an luah deuh vek tawh thute a sawi.
Mizorama mimal, khawtlang leh kohhran sikul tam takin sorkar ṭanpuina an dawn ve theih loh laia sikul tihtawp tawh Zasai Memorial H/S hnena sorkar ṭanpui pek tura thutlukna siam a ni chu mipui mak tih a tling nia sawiin Lalremruata chuan, "Sikul awm tawh lo ṭanpuina pek tur an tih hi paih nghal a, thil dik lo leh tenawm tak titute chhui chhuak a, an phû tâwk hremna pe ngei turin kan phût tlat a ni," a ti.
Remruata Renthlei chuan, Zasaia Memorial H/S chu kum tam tak chhung a tàwp tawh chungin sorkar aṭangin ṭanpuina an lo hmu reng ṭhin em tih chu an zawhna a nih thu a sawi a, "H/S bikte tana ṭanpuina sorkarin kum khata Rs 2,50,000 a pek hi an dawng reng ṭhin em? Sikul awm tawh lo a ni tih eng vangin nge School Education department-in a hriat loh theih?" tiin zawhna a zawt a ni.
MPCC Media Chairman chuan, School Education miniser Lalchhandama Ralte chu Samagra hnuaia thawkte dinhmun siamṭhat tumna sorkarin a neih leh neih loh a zawt bawk.