ZPM goal chu Pathian ram din a ni - ZPM Vice President

2nd October, 2023

ZPM vice president Rev. Dr K Thanzauva chuan, ZPM party thil tum (goal) chu Pathian ram din a nih thu a sawi a; Mizoram hmelma lian ber eirûkna tihbo tumin hma an la a, chu chu kalphung thar zinga pawimawh ber a nih thu a sawi bawk.

Rev. Dr K Thanzauva hian September 30, Inrinni zinga Hnahthial Bazara street campaign-ah thu sawiin, "ZPM goal chu Pathian ram din a ni a, a hmanrua atana kalphung thar, mipui sorkar kan duh. Mipui sorkar kan nei hlei thei lo a, sorkar kan neihte hi party sorkar an ni ṭhin. Kan sorkar chuan party dang sawhthing chìn pawh kan lei vek dawn. Party dang mi leh sa pawh ni se exam-naa a tih ṭhat phawt chuan appointment kan pe dawn a ni," a ti.

Mizoram buai hnua state a nih hnuah hmasawnna a kal muang nia sawiin K Thanzauva chuan, "Hmasawnna kalkawnga pên ṭha hlei thei loa min siamtu chu corruption a ni a, tu mahin an pha lo. Kan hmelma lian ber phûm bo tumin hma kan la a, hei hi kalphung thar pawimawh ber a ni," a ti a; ZPM MLA candidate zawng zawng chu corruption-a inhnamhnawih lo tura an intiam vek thu a sawi.

ZPM Vice President chuan MNF sorkar hnuaia harsatna (crisis) pahnih sawiin, mautâm leh Covid-19 a nih thu a sawi a, "Heng harsatna thlenga an hmalak dan kan hre vek a, a lungawithlak loh a ni. MNF nationalism hi questionable a ni, hnam hi an hmangaih tak tak em?" a ti.

Ram hruai tawhte leh hruai mekte'n politics chu sumdawn nan an hmang nia sawiin K Thanzauva chuan, "Politics hi sumdawnna atana kan hman chhung chuan kan ram kan tihmasawn ngai lo ang," a ti a; politics chu ram hruaina atan inpekna nena thawh chi a nih thu a sawi.

Rev. Dr K Thanzauva chuan, Mizoramin hmangaih tak taktu a mamawh tih sawiin, "Kan ram hi kan develop dawn a, hma lam kan pan dawn a nih chuan a sawi mai ni loa hmangaihtu tak tak, ram tana tuar ngam kan mamawh a, chu chu Mizo new nationalism chu a ni. Eiru ṭûn ṭûn chunga ram ka hmangaih ti hi tu mahin an awih chuang lo," a ti.

Inkhawmah hian South Tuipui biala ZPM candidate tur Jeje Lalpekhlua pawhin thu a sawi a ni.