Party dangin sorkar ve an châk hian sum dinhmun chhiat lohzia a tarlang - MNF Media & Publicity

MNF Media & Publicity department hotute chuan September 30, Inrinni khan Aizawl Press Club-ah thuthar thehdarhtute an kâwm a; political party dangin sorkar ve an châk viau chuan Mizoram sorkar sum dinhmun a chhiat lohzia a tarlang niin an sawi.

MNF Media general secretary VL Krosshnehzova chuan, sorkar sum bat hnem thu hahípa sawi a, phurrit lian tak nei anga sawi a, sorkar siam leh turte tana huphurhawm ang hiala sawitute chuan Mizoram harsatna phurh an huphurh nia a lan thu a sawi a, "Huphurh chung sia sorkarna siam tuma tha tàwp an chhuah lawi si hi a nuihzatthlak viau. Heti taka sorkar ve an châk hian sum dinhmun chhiat lem lohzia a tarlang chiang viau," a ti.

Sum chungchanga Mizoramin harsatna a tawh mek phurh chhuah chu MNF-in an huphurh lo tih sawiin Krosshnehzova chuan, "Hripui nasa tak leh harsatna tam tak pawh Pathian puihnain a lo sual chhuak tawh," a ti a; mipuite'n harsatna karah pawh sorkar an thlàwp tlat avangin an ṭan rual phawt chuan harsatna sutkian theih a nih thu a sawi.

MNF Media General Secretary chuan, hun khirh tak tak - hripui léng, lirnghing, ran pûl, kângmei, ramri buai leh raltlan tam tak vanga harsat­nate dinhmun chhe lutuk loa paltlangpui thei chief minister Zoramthanga an nei niin a sawi a, "Mizoramin hetiang CM kan nei hi a vanneihthlak a, a ropui tak zet a ni," a ti.

MNF Media hotute chuan, harsatna tam tak karah hmasawnna hmuh tur a awm bakah, ei leh in tur nghei loa an awm thu sawiin, "Kan ram hruaitu lu ber leh a thawhpuite thawhrimna tifiahtuah kan ngai. Pathianin min kalsan lo a, min hum zel tih a chiang hle," an ti a; hun muanawm zawk leh remchang zawk Mizoramin a tawn zel an rin thu an sawi.

'Pathian leh kan ram tan' ti chungin sorkarna chelh leh an inhuam reng thu sawiin MNF Media hotute chuan, "Beiseina nung neiin kan ram, kan hnam tan thisen far tawp thlenga ṭan tlat hi MNF chuan a inhuam reng," an ti a; Mizoram mipui thlàwpna leh puihna an ngen a ni.