CADC CEM leh a thawhpuite ZPM-ah lawm luh an ni dawn

Chakma Autonomous District Council (CADC)-a chief executive member (CEM) Rasik Mohan Chakma leh MDC dang 16-te chuan ZPM zawmin, CADC-ah ZPM sorkar an siam dawn nia thu dawn a ni.

Vanglaini palai zawhna chhangin Rasik Mohan Chakma chuan ZPM an zawm dawn thu a sawi a, "MNF MDC 16 leh Congress MDC pakhatin ZPM kan zawm dawn. MNF MDC-te a ruala lawm luh kan ni ang a, Congress MDC erawh a hranaa lawm luh a ni ang," a ti.

Rasik Mohan Chakma chuan, kumina MLA inthlanpui awm turah Tuichawng bialah ZPM ticket-in a ding dawn tih Vanglaini palai a hrilh bawk. CADC-a MNF MDC 16-te hian September 29, 2023 khan MNF party aṭanga banna an thehlut.

Kumin May thla khan CADC inthlanpui neih a ni a, seat 20 awmnaah MNF-in bial 10, BJP leh Congress party-te'n bial panga ve ve an chang a; inthlan hnuah party awmna sawn an awm nual avangin tunah chuan MNF-in MDC 18 an nei a, BJP leh Congress party-in MDC pakhat ve ve an nei.

Rasik Mohan Chakma kaihhruai CADC-a MNF sorkar kal mek chu May 25, 2023 khan lak luh a ni.