KHAWTHLIR

Blood Donation Day hmang dawn

Nimin October 1 kha National Voluntary Blood Donation Day a ni a, Pathianni a nih avangin naktuk hian MSACS leh Association for Voluntary Blood Donation huaihawtin Dawrpui Multipurpose Hall-ah hman a ni ang.

Dengue vei 821

State Vector Borne Disease Control Programme tarlan danin, kumin 2023-ah January aṭanga September 17 thlengin dengue vei leh vei loh endik mi 7,720 an awm a, chu'ng zinga mi 821 chuan dengue an vei tih hmuh chhuah a ni a, dengue vei zinga mi pakhatin a thihpui. January-August, 2023 chhungin mi 2,20,611 thisen endik zingah sikserh (malaria) vei mi 7,424 hmuh chhuah a ni bawk a, chu'ng zinga mi pakua chu an thi a ni.

CMO pisa hawng

Hnahthial Chief Medical Officer pisa sak thar chu September 29, 2023 khan Health & Family Welfare minister Dr R Lalthangliana'n a hawng. Pisa hi cheng nuai 397 sénga sak a ni a, chhawng nga niin, December 17, 2021-ah sak ṭan a ni.

Street campaign

ZPM party chuan September 30, Inrinni zing khan Chaltlang Peri Mual leh Durtlang Dawrkawnah Street Campaign an buatsaih a, MLA Vanlalhlana leh AMC councillor R Lalawmpuii, Zonu president ni bawk ten thu an sawi.

MLA-in hawng

Health & Family Welfare Board vice chairman Dr ZR Thiamsanga, Champhai North bialtu MLA chuan September 30, Inrinni khan Neihdawn leh Tualpui khuaah Health & Wellness Centre thar a hawng. Zanah Hmunhmelṭha khuaah high school, primary school, VC house leh bazar shed cum library-te a hawng bawk.

MLA-in hmanpui

MHIP, Ngopa Block chuan September 28-29, 2023 khan Ngopa Jubilee Hall-ah Block Conference leh an kum 25-na, silver jubilee lawmna hun an hmang a; bialtu MLA Dr L Thangmawia'n hmanpuiin, jubilee lawmpui nan Rs 50,000 a hlan.