Hripui vei tawh zat - 648 Niminah mi 7 an chhuak

August 11, Thawh­lehnia swab sample endik zinga tlai dar 5 hnua swab sample endik result hriat belhah Covid-19 vei mi 20 an awm belh a, Thawhlehnia hripui vei hmuh chhuah zat erawh chu 25 a ni. Mizorama hripui vei hmuh chhuah chu mi 648 an tling tawh.

Nimin khan Covid-19 vei vanga enkawl zinga BSF sipai pasarih chu Covid Care Centre (CCC), Zobawk damdawi-in aṭangin chhuahtir an ni. Mizorama hripui vei hmuh chhuah tawh mi 648 zinga mi 330 (50.93%)an chhuak tawh a, enkawl mek mi 318 (49.07%) an awm. Covid-19 veite enkawlna hmuna la awm mek zingah hripui vei tawh lo (negative tawh) tih finfiah mi eng emaw zat an awm a ni.

ZMC laboratory-a RT-PCR hmanga Thawhlehnia swab sample 157 (mipa 103 leh hmeichhia 54) endik zingah Covid-19 vei Aizawl district mi 10 hmuh chhuah a ni a; hmeichhia pasarih leh mipa pathum niin, an zingah nausen thla thum mi leh naupang kum 7 mi an tel a, mi dang zawng chu kum 15-63 inkar an ni. Mi pahnih chu Assam leh Karnataka aṭanga lo kîr, quarantine facility a awm mek an ni.

Mi 10 zinga pariat erawh chu Chaltlang Lily Venga hripui vei tawh police (frontline worker) pakhatin a kai chhàwnte nia hriat a ni a, home quarantine-a awm mek an ni. Chal­tlang Lily Veng Local Task Force thu­chhuakin a tarlan danin, police hi BSF ho khung hranna quarantine centre - NIELIT, Zuangtuia duty aṭanga hripui kai nia hriat a ni.

Lunglei Civil Hospital laboratory-ah TrueNAT-PCR hmanga swab sample endik mi 10 zinga a zatve, mi pangain Covid-19 an vei tih August 11 khan hmuh chhuah an ni a, an vaiin 61Bn BSF mi leh sa, mipa kum 31- 52 inkar an ni. Quarantine facility-a awm lai an ni a, harsatna (Covid-19 symptom) an nei lo.

August 11 vêk khan Vairengte checkgate-ah Mizorama lut tur lirthei enkawltute Rapid Antigen Test hmanga endiknaah tlai dar 5 hnuah Covid-19 vei mi panga hmuh chhuah belh a ni a, chhun lama hmuh chhuahte nen mi 10 hmuh chhuah a ni. Mi 10-te chu lirthei khalhtu Assam state mi, mipa kum 19-32 inkar an ni a; heti hian August 10, Thawhṭanni tlai aṭanga Mizorama lut tur reng reng Vairengte checkgate-a RAT hmanga endiknaah Thawhlehni zanlai thleng khan mi 12 hmuh chhuah a ni tawh.

Thawhlehnia Rapid Antigen Test hmanga swab sample endik zawng zawng chu 880 a ni a, Lawngtlai district-a truck driver leh handyman tangkhang positive contact mi 42-te chuan hripui an vei lo tih hmuh a ni.