Minister-in hall sak thar a hawng
Minister of state TJ Lalnuntluanga chuan September 30, Inrinni khan a bial Champhai South chhunga Tuipui Community Hall cum Boxing Hall a hawng a; Tuipui khuaah health worker dah tura hmalak ni mah se, health worker thawk tur zawn chawp an ngai chu buaithlak a tlin thu a sawi.
Community hall/boxing hall thar hi Shyama Prasad Mukherji Rurban Mission dum nuai 40 leh MLA fund cheng nuaih 10 sênga sak a ni a; May 10, 2022-ah sak ṭan niin, December 29, 2023-ah sak zawh a ni.
TJ Lalnuntluanga chuan, Tuipui khaw hmasawnna atan sorkarin theihtawp a chhuah ṭhin thu sawiin, "Tuipui khuaah health worker dah tura hmalak ni mah se, health worker thawk tur zawn chawp an ngai chu buaithlak a tling a, Tuipui khuaa mi ngei health worker an awm theih nan zirna kawngah pawh hmasawn tum ang che u," a ti a; ṭhalaite chu zirna uar turin a chah.
Champhai leh Aizawl inkar kawng siamin Tuipui khua a hêl vanga Tuipui khawtlang hruaitute'n an khua aṭanga kawngpui thar kal pawh theihna tura hmalak an dilna chungchangah Minister chuan, "Kawng laihna tur sum dah tawh a ni a, laih mai theih a ni tawh," a ti.