Reiek-in Best Tourism Village an lawm

Reiek khua chuan September 30, Inrinni khan an community hall-ah Best Tourism Village 2023 an dawn an lawm a, Tourism minister Robert Romawia Royte-in a hmanpui. Minister hian Reiek tlang leh Khuangchera Pûk tihchangtlunna tur project lungphûm a phûm a, tourism kaihhnawiha Reiek leh Reiek Tlang tihchangtlunna a hawng bawk.

Robert Romawia Royte chuan, Best Tourism Village lawmman an dawn avangin Reiek khuaah khualzin an tam phah dawn thu sawiin, "Khawvel pum huap Best Tourism Village inelna buatsaih mekah Reiek khua hi candidate village a ni ve a, beiseina sang tak nen kan thlir mek," a ti a; khualzin dawnsawn danah hawihhâwm chhuah zel turin a chah.

Minister hian North East Special Infrastructure Development Schemes (NESIDS) leh Pilgrimage Rejuvenation and Spiritual Augmentation Drive (PRASAD) aṭanga hmuh cheng nuai 361.27 sénga siam tur, Development Works at Khuangchera Cave, Reiek and PFC (Pilgrim Facilitation Centre) at Reiek Peak project lungphùm a phúm. Hna hi Excell Consultancy Services, Mission Veng thawh tur niin, June 2025-ah zawh tur a ni.

Robert Romawia hian Development of Infrastructure for Tourism at Reiek and Reiek Tlang project a hawng bawk a; NESIDS sum nuai 560 sénga thawh niin, contractor chu DJ Consultation Services, Chaltlang an ni.