Nau piang hlim pawhin leiba cheng sing tél an nei sa ang a ni - MPCC President

Mizoram Pradesh Congress Committee (MPCC) president Lalsawta chuan, Mizoram sorkar leiba a tam a, nau piang hlim pawhin leiba cheng sing tél an nei sa ang a nih thu a sawi a; sorkar ṭha leh felfai siam turin Congress party an rintlak niin a sawi bawk.

Lalsawta hian September 30, Inrinnia Sesawng Venglai community hall-a Chalfilh Congress Joint Block Conference a hmanpuinaah thu sawiin, "Kan ram hian sum leh paiah thûk takin harsatna kan tâwk a, nau piang hlim pawh leibá sing tél nei sa angin harsatna kan tâwk a ni," a ti.

Mizoram leh mipui enkawl turin a ngaihna hria sorkar ṭha, felfai leh a ṭul ang zela che chhuak thei, eirûkna awm lo sorkar Mizoramin a mamawh thu sawiin Lalsawta chuan, "Chumi tur chuan hruaitu ṭha kan mamawhna hi a hmanhmawhthlak tawh. Hei hi Congress hian kan ti thei, kan rintlak tih kan hria," a ti a; ni tin ruihhlo man thu hriat tur a awm thu sawiin, ṭhalaite'n kawng dik an zawh vat a ngaih thu a sawi.

Political party dang chungchang sawiin Lalsawta chuan, "Mizo mipuite duh loh BJP rim nam thur thur tualṭo party ZPM leh BJP nena inthlun zawm reng MNF party-ah rinna nghah ngam chi a ni lo. Anni kutah kan ram, kan hnam leh kan sakhaw tana him lo Citizen Amendment Act, Uniform Civil Code leh Forest (Conservation) Amendment Bill a takin hman a ni thuai ang," a ti.

MPCC President chuan, pheikhawk lei turin bun chhin ngai mah se, electric erawh khawih chhin chi a ni lo tih sawiin, "Ram enkawlna hi enchhin chi a ni lo, a nghawng a na lutuk. Khawvel ram hrang hrangah sorkar an enchhin ngai lo. An hriat chian sa an thlang ṭhin. Kan ram, kan hnam, kan sakhua humhim turin Congress party a sorkar a ngai," a ti bawk.

Inkhawmah hian Chalfilh bial Congress party candidate tur Vanneihthanga Vanchhawng pawhin thu a sawi a ni.