Zakapa Chawimawina Ni hmang

September 30, Inrinni khan Khawhri community hall-ah hmanlaia an khaw lal ṭhin Zakapa Chawimawina Ni buatsaih a ni a, minister Dr R Lalthangliana, bialtu MLA-in a hmanpui.

Minister bakah Central YMA president R Lalngheta'n thu a sawi a; Pachhunga University College assistant professor Dr H Laldinmawia'n 'Zakapa leh Mizo nationalism, ṭhangtharte tan' tih a sawi. Zakapa Award 2023 dawngtu Dr Lalrinawmi Ralte-in thu a sawi bakah, MHIP, MZP leh MSU aiawhte pawhin thu an sawi. Zakapa pualin khawtlang ruai buatsaih a ni.

Dr R Lalthangliana chuan, Zakapa chu lal ropui leh huaisen a nih thu sawiin, "Mizo lal dang huaisen leh chawimawi tlak an tam hle rualin, Pu Zakapa kha chuan a khua leh tuite humhalh dan tur dik taka humhalhin a chawimawi a ni," a ti a; Zakapa'n a khua leh tui hmeichiate a humhalh danah Mizo ṭhangthar mipate'n zir tur an ngah thu a sawi.

R Lalthangliana chuan, Mizo hnam rilru pu thar leh turin mipui a chah a, "Mizo kan nih angin Zo nun ze mawi dik tak chawi nung thar leh ila. Chu chu Mizo mipa ṭhangtharte'n kan tihmâkmawh a ni," a ti.

Zakapa chawimawina inkhawmah hian MLA pahnih - Lalrintluanga Sailo leh Dr L Thangmawia te pawhin thu an sawi a ni.