Education Minister-in Hindi zirtirtu tipung leh turin MoE hotute a ngen

School Education minister Lalchhandama Ralte chuan Septemer 29, 2023 khan New Delhi-ah Ministry of Education (MoE) hotute a kâwm a; MoE-in Mizorama Hindi zirtirtu 855 aṭanga 812-a a tihtlem chu tipung leh turin a ngen.

Lalchhandama Ralte hian MoE additional secretary Vipin Kumar leh joint secretary Prachi Pandey te hmuin, Samagra Shiksha leh PM Poshan scheme hnuaia sorkar laipuiin Mizoram tana sum a la pek chhuah lohte a rang lama pe chhuak thuai turin a ngen a; Mizorama Hindi zirtirtu 855 awm mek, MoE-in 812-a a tihtlem chu tipung leh turin a ngen bawk.

Sorkar laipui hotute chuan Minister-in Hindi zirtirtu chungchanga a ngenna chu ziaka thehlut tur leh ngaihtuah an tum thuin an chháng a; sum la pek chhuah lohte pawh tun karah pek chhuah theih an beisei thu an lo hrilh.

Sorkar thuchhuah tarlan danin, tun hnaia adhoc aided school aṭanga sorkar sikula hlan kai tharte chu sorkar laipui hotute chuan sikul dinhmun chhinchhiahna, UDISE-ah lo siamṭhat an phalsak a, chumi behchhan chuan sorkar sikula hlàn kai tharte tan sorkar sikulte'n an dawn ṭhin, a thlawna sem - uniform grant, textbook leh composite grant-te a thuphungin pek ve nghal an remti a ni.

Mizoram sorkarin adhoc grant-in-aid aṭanga sorkar sikula a hlan kaite chu hriattirna tihchhuah hunah sorkar laipui hotute chuan an chanvo tur dil an phalsak a, kum thar annual plan siamah dinhmun thara hlan kai sikul 180-te'n an hlâwkpui dawn niin sorkar thuchhuahin a tarlang bawk.

Education Minister School Education additional director Lalhmachhuana, Samagra Shiksha state project director ni bawkin a ṭawiawm a ni.