College-ah M.A a zir theih dawn rih lo

State Higher Education Council hmalaknaa Aizawla college ṭhenkhata master degree zirna dah tumna awm chu Covid-19 léng vang leh zirtirtu indaih lohna vangin tihpuitlin mai theih a ni dawn lo.

Vanglaini palaiin a kawm­naah Rashtriya Uchchatar Shiksha Abhiyan (RUSA) hotute chuan, Mizo zirlai, under graduate zo tawh zingah master degree zir duh an tam avang leh Mizoram University (MZU)-ah seat an indaih loh avangin State Higher Education Council (SHEC) chuan Aizawla college ṭhenkhatah subject thlan bik neiin master degree zirna hawn an tum a, MZU pawhin phalna a pe tawh.

College-a master degree din tur hian Govt Aizawl College-ah Education dubject, Hrangbana College-ah Commerce leh Aizawl West College-ah History zirnate hawn tum a ni a; heng college-ahte hian master degree zirna din theih a nih leh nih loh MZU Inspection Team-in an enfiah tawh a, tuna zirtirtu dinhmun enin, M.A zirna hawng turin an phâk lo hlawm niin an sawi. 

MZU vice chancellor KRS Sambasiva Rao kaihhruainain Affilia­ting Committee chuan college-a M.A zirna hawn dan kawng an zawng leh a, inspection team dinin hma an la a, Higher & Technical Education minister Dr R Lalthangliana hoin an sawiho tawh a ni.

Ruahman dan chuan, college-a M.A zirna hawn ṭan kumah chuan subject pakhatah zirlai 10 ṭheuh awm tura tih a ni a; zirtirtu chu a tìrah pathum ṭheuh dahin, kum hnih hnuah zirtirtu dang pahnih dah belh leh tura ruahman a ni. Classroom pahnih siam tur niin, semester tinah lehkhabu chi hrang 100 ṭheuh neih tur a ni a; National Assessment & Accreditation Council (NAAC) teh­fung­ah an tlin reng a ngai. National Institutional Ranking Framework-ah an tel tur a ni a, zirtirtute chu state sorkarin a pek a ngai bawk.

MZU chuan rua­hmanna thui tak siam tawh mah se, harsatna hrang hrang leh bawhzuina tak tak a awm theih rih loh avangin college-a master degree hawn tum chu tihpuitlin theih a ni rih dawn ta lo a ni.

M.A (History) zirna tura ruahman Aizawl West College-a zirtirtute sawi danin, an college-ah History zirtirtu panga an awm ṭhin a, chu'ng zinga pali (regular pathum leh contract pakhat) chuan Ph.D an nei. Chutih laiin, zirtirtu zinga senior ber pakhat Ph.D nei lo a thi a, zirtirtu pakhat chu Aizawl North College-ah sawn a ni a, pakhat dang chu principal a nih avangin, Ph.D nei zirtirtu pahnih chauh an awm a, chuvang chuan M.A zirna hawn ngaihna a awm rih loah an ngai. Sorkarin master degree zirtir thei tur zirtirtu pathum a pek theih chuan an tih theih an rin thu an sawi.