Mizoramah Faina Hapta ṭan a ni

Nimin khan Mizoram hmun hrang hrangah Faina Hapta (Cleanliness Week) hawn a ni a; Aizawlah chuan chief secretary Dr Renu Sharma-i'n Aizawl DC pisa tualah a hawng.

Aizawl District Cleanliness Week hawnnaah hian Aizawl DC pisaa thawkte leh Comprehensive Model School zirlaite'n DC pisa leh a chhehvel kawngpui dung tifaiin an hnatlang a; district hrang hrang leh hmun dangahte faina hnatlang huaihawt a ni bawk.

Chief Secretary chuan, faina leh thianghlimna chu mihring nun nawmna leh ram hmasawnna nen kal dun tlat a nih thu sawiin, "Sorkarin faina ngai pawimawhin khawtlang nuam, ram nuam kan siam theih nan hetiang hun hi hmanrua atan a buatsaih a ni. Kum khatah faina atana ni khat emaw, hapta khat emaw chauh dah hi duhtâwk mai tur a ni lo a, ni tin kan nunah faina leh thianghlimna hi seng luh a ṭul," a ti.

Lungleiah chuan Faina Hapta hi Convention Centre-ah bawrhsap Ramdinliani'n a hawng a, Lunglei district-a khaw 11-ah lui hnár thenfai leh khawlai tihfai hnatlang huaihawt a ni.

Ramdinliani chuan, kawng siam nan plastic hmang tura NHIDCL leh Lunglei DC kal tain inremna, memorendum of understanding an ziah angin plastic ûm paihna tur hmun paruk siam a nih thu a sawi a, chu'ng hmunah chuan paih ṭhin turin mi tin a chah.

Siaha district bawrhsap Lalhmunsanga Hnamte chuan DC pisa tualah Faina Hapta a hawng a; Siaha Officer' Club member-te chu Faina Hapta pualin Siaha Helipad tifaiin an hnatlang. Kolasib-ah hian Swachhata Hi Seva khàr nghal a ni a, faina thutiam sawiho niin, Faina Hapta hman zel dan tur tarlang a ni.

Kolasib-ah chuan DC pisa tualah bawrhsap John LT Sanga, Kolasib Town Sanitation Task Force chairman ni bawkin Faina Hapta a hawng. September 15 - October 2, 2023 chhunga Kolasib district-a Swachhta Hi Seva hnuaia faina kawnga hmalak dan tarlan a ni a; kal khawmte'n faina thutiam (swachhta pledge) an sawi rual.

Lawngtlai DC pisa tualah LADC executive member C Rongura hoin Faina Hapta hman ṭan a ni a; kal khawmte'n fai thutiam an sawi rual. Lawngtlai khawpuia veng hrang hrangah VC-te kaihhruaiin faina hnatlang neih tura ruahman a ni.

Mamit bawrhsap VL Remliana chuan DC pisa tualah Faina Hapta a hawng a, hmalakna neih zui chu a hawnna aia pawimawh zawk a nih avangin faina kawnga ṭan la thar ṭheuh turin kal khawmte a chah.

Hnahthialah chuan UDPA department bul tumin HBSC Ground 1-ah Faina Hapta hawn a ni a, bawrhsap Chuauhnuna'n a hmanpui. September 15 - October 2, 2023 chhunga faina lama beihpui thlakna, Swachhata Hi Seva (Cleanliness is Service) puala buatsaih fai inelna hlawm ṭhen hrang hranga ti ṭhate hnenah lawmman hlan a ni.

Assam Rifles pawhin nimin khan Aizawl leh hmun dang dangah faina hnatlang huaihawtin, Sawachta Pledge sawi rualna hun an hmang a; Assam Rifles mi leh sate bakah, Mizoram sorkara hotu ṭhenkhatte leh tualchhung mite an tel.