Gandhi Jayanti Exhibition ṭan a ni

Raj Bhavan Secretariat leh Commerce & Industries department chuan Mahatma Gandhi pian champha pualin nimin khan Raj Bhavan Circular Lawn-ah Gandhi Jayanti Exhibition an buatsaih ṭan a, Governor Dr Hari Babu Kambhampati-a'n a hawng.

Gandhi Jayanti Exhibition-ah hian dawr 62 awmin, puantahtute kutchhuak leh kut themthiamna hmanga siam chhuah te, ei tur chi hrang hrangte leh PM Viswakarma Yojana help desk leh loan la duhte tana pan tur help desk-te a awm a; vawiin leh naktukah chhunzawm tur niin, a duh apiang tan tlawh theih a ni.

Governor chuan, India hnampa Mahatma Gandhi chu India ram tana mi hlu bik a nih thu sawiin, "Exhibition hi Mahatma Gandhi zirtirna zúlin khawtuala kan thil siam leh deh chhuahte ngaihhlut inzirtirna bakah, sumdawngte leh kut hnathawktute chawikanna atana buatsaih a ni," a ti.

State tênau zawkah handloom industry, micro, mini leh medium business lam hawia hmalak a fuh ber nia sawiin Larsap chuan, "Kan state a lian lo a, mihring kan tlem bawk a, industry lian pui pui din a remchang lo thei. Tualchhunga kan tharte leh in lamah kan siam theih apiangte hi hlâwk takin sumah kan chantir thei a, kutkawih eizawnna lama mite thil siamte kan hlutsak a ngai a ni," a ti a; Exhibition chhim vek turin mipui a sáwm.

Commerce & Industries minister Dr R Lalthangliana chuan, Mizorama handloom leh handicraft-a hma latute kutchhuakin belhchian a dâwl telh telha a hriat thu a sawi rualin, ṭan la sauh sauh turin a fuih a, "Mizo puan, kawr leh thawmhnawte bakah, kutthemthiamte thil siamte'n belhchian a dâwl a nih phawt chuan a leitute'n sum tam zawk sengin an lei ngam reng a ni," a ti.

Gandhi Jayanti Exhibition hawnna hi Commerce & Industries director Florence Zotluangpuii'n a kaihruai a; chief secretary Dr Renu Sharma leh sorkar hotu dangte pawh an tel a ni.