CADC MDC-te'n ZPM zawm dawn leh lo

Chakma Autonomous District Council (CADC)-a chief executive member (CEM) Rasik Mohan Chakma leh MDC dang 16-te chuan ZPM zawm an tum hnuah an zawm leh dawn lo.

MNF president Zoramthanga'n social media-a a tarlan danin, CADC CEM Rasik Mohan Chakma leh a thawhpuite hian MNF zawm leh turin thutlukna an siam a, MNF chuan lawm takin an lo pawm a ni.

Tarlan tawh angin, Vanglaini palai zawhna chhangin RM Chakma chuan ZPM an zawm dawn thu a lo sawi tawh a, "MNF MDC 16 leh Congress MDC pakhatin ZPM kan zawm dawn. MNF MDC-te a ruala lawm luh kan ni ang a, Congress MDC erawh a hranaa lawm luh a ni ang," a ti a; kumina MLA inthlanpui awm turah Tuichawng bialah ZPM ticket-in a ding dawn tih a sawi bawk.

May 2023 khan CADC inthlanpui neih a ni a, seat 20 awmnaah MNF-in bial 10, BJP leh Congress party ten bial panga ve ve an chang. Inthlan result puan hnuah party awmna sawn an awm nual avangin tunah chuan MNF- in MDC 18 an nei a, BJP leh Congress party-in MDC pakhat ve ve an nei.

Rasik Mohan Chakma kaihhruai CADC-a MNF sorkar kal mek chu May 25, 2023 khan lak luh a ni a; MNF MDC 16-te chuan September 29, 2023 khan MNF party aṭanga bànna an thehlut a ni.