Mahatma Gandhi limah pangpar dah

Nimin October 2 kha India Hnampa Mahatma Gandhi pian champha vawi 154-na a ni a, India ram pumah hman a ni. Mizoramah pawh zing dar 7:30 khan Mizoram sorkara hotute'n Pachhunga University College campus-a Mahatma Gandhi limah hriatrengna leh zahna pangpar an dah.

Mahatma Gandhi limah hian Governor Dr Haribabu Kambhampati leh chief minister Zoramthanga te, minister pali - Lalchamliana, R Lalzirliana, Lalruatkima leh Robert Romawia Royte te, chief secretary Dr Renu Sharma leh sorkar hotu dangte'n pangpar an dah a ni. PUC principal Prof. Lalthanzara leh a thawhpuite chuan kal khawmte tan thingpui ruai an buatsaih.

Mahatma Gandhi pian champha hi United Nations Organisation chuan kum 2005 khan International Day of Non-Violence atan a puang. Lammual gate bul, Zodin Square-a Mahatma Gandhi lim dahna ṭhin chu siamṭhat tum a nih avangin PUC campus-ah India hnampa lim dah lailawk a ni.