ZPM sorkarah chief minister-in work department a chang dawn lo - Duhoma

ZPM leader Lalduhoma chuan, ZPM sorkarah chief minister-in work department a chan dawn loh thu a sawi nawn a, Mizoram leiba nei tam chungchanga chhiarkawp dik lo hmanga leibat zat mipui hnena sawi ṭhin chu dik lo an tih thu a sawi bawk.

Lalduhoma hian nimin khan Saitual Auditorium-a ZPM Ṭawi East Block inkhawmpui a hmanpuinaah thu sawiin, "ZPM a sorkar chuan CM-in works deparment a chan ve dawn loh avangin MLA-te bial a theihtawpin a vilpui dawn a, chuvang chuan ZPM MLA candidate-te in vote hian CM tur in vote tel nghal zel a ni," a ti.

Mizoram sorkar leiba chungchangah Duhoma chuan, "India rama leiba ngah ber state kan ni tih kan sawi ṭhin a, dâwt sawi ang lek lekin min bei lêt duh zel. Chhiarkawp dik lo hmanga kan leiba zat mipui hnena hrilh hi a dik lo kan ti a ni," a ti a; sorkar kalphung duhkhawp lohna kan sawite chu mi dang sawiselna leh sawichhiatna ni loin, sorkar kalphung dik lo mipui hneha hriattirna a nih thu a sawi.

Lalduhoma chuan, Mizoram sorkarin tun hnaiah sikul tam tak dinhmun ṭha zawka a dahte chu an lawmpui thu a sawi rualin, "Engati nge inthlan dawn ṭêpah chauh an tih? Tun hma pawhin hetiang tho hian an lo ti tawh a, hma an la zui leh hleithei si lo a, khawtlang rilru tinatu leh sorkar leh tur tan phurrit siamsaktu an lo ni tawh. Vote zawn nan ringawta mipui dâwi kual hi sorkar ṭha zia a ni lo," a ti.

ZPM Leader chuan, Mizoram chu Kristian ram ni mah se, India rama AIDS vei tamna ber a nih thu sawiin, "Ruihhloah kan ṭhalai tam tak an tlân a, a mualphothlak hle. Kan pung muang em em a, ṭhalai thi kan tam em em mai a, nupa inṭhen tamna state kan ni. Heng zawng zawng hi kan politics nen a inkaihhnawh vek a ni," a ti a; kawng hrang hranga Mizoram dinhmun ṭha lo siamṭha turin ZPM-in hma an lak dawn thu a sawi.

Indian Constitution Article 371G chu BJP sorkarah an hunah a ṭhiah mai a hlauhthawnawm thu sawiin Lalduhoma chuan, "Kristiante tan BJP sorkar hi a him lo em em a, BJP sangawi zawnpuitu, NDA, BJP sorkartir leh tumtu pawla MNF an tel tlat mai hi pawi kan ti," a ti. ZPM chu central-a zawm nei ve lo leh hlauh nei ve lo tur a nih avangin chu chu an inchhuanna pakhat a nih thu leh, ram hmangaih vanga martarte kha tho leh se, tuna MNF kalphung vangin an rilru a na hlea a rin thu a sawi bawk.

Inkhawmah hian Ṭawi biala ZPM candidate tur Lalnilawma leh Zonu president leh AMC councillor R Lalawmpuii te pawhin thu an sawi a ni.