Thla ruk kal ta chhunga lirthei dan bawhchhiate'n Rs 62,52,500 chawi

Aizawl leh a chheh-velah dan zâwm loa lirthei khalhtu Transport department enforcement staff-te'n thla ruk kal ta chhunga an mante sum chawi tling khawm chu cheng nuai 62 chuang a tling.

District Transport Office, Aizawl hnuaia enforcement staff-te'n Motor Vehicle Act leh lirthei kaihhnawih dan bawhchhiat vanga kumin April aṭanga September thlenga lirthei leh a khalhtu an mante sum an chawitir zat chu Rs 62,52,500 a ni a, a vaiin sorkar sum báwmah chhûn luh a ni.

Kumin September thla bikah dan bawhchhia lirthei man zat chu 185 a ni a, e-challan hmanga dan bawhchhia sum chawitir mi 14 awmin, lirthei an man aṭanga sum an chawitir chu Rs 820,500 a tling.

Transport enforcement hotute chuan, lirthei document tifel lo tan December 31, 2023 thleng late fee ngaihdam hun pawhsei a ni tih an sawi a; ngaihdamna hun hawn chhunga tifel turin tihfel ngai neite an ngen a, lirthei fitness leh fitness certificate ngai pawimawh turin an ngen bawk.