KHAWTHLIR

PYD-in thisen pe

Pentecostal Youth Department (North East India), Lawngtlai district chuan PYD Social Work Day pualin nimin khan Lawngtlai District Hospital-ah thisen unit 25 an pe a, petute mipa 20 leh hmeichhia panga an ni.

Free medical camp

Social Welfare and Tribal Affairs department leh ICFAI University, Mizorama Social Work department chuan International Day of Older Persons (Upate Ni) pualin nimin khan Senior Citizen’s Home, Ainawn Vengah Ainawn Veng MUP member-te tan free medical camp an buatsaih. A thlawna inentirnaah hian mi 121 an inentir a, an mamawh ang damdawite a thláwnin sem a ni.

AR-in tanpui

Assam Rifles chuan Mahatma Gandhi pian champha pualin nimin khan Cancer Society, Zemabawk hnenah ṭanpuina an hlan. AR hotute'n Cancer Hospital an tlawh a, damlote hnenah ṭanpuina thil chi hrang hrang an hlan a ni.

Mamit Jail tlawh

Prisons inspector general R Lalremsanga chuan nimin khan Mamit District Jail a tlawh a; jail tángte kâwmin, harsatna leh mamawh an thlenah hmalakpui a tum thu a hrilh. Jail-a thawktute chu an inenkawlna leh hmunhmate felfai a tih thu hrilhin, jail chu inhremna ngawr ngawr ni loa insiamṭhatna hawi zawnga kalpui a ṭul thu a sawi.

Sikul sak thar hawng

Minister Lalrinawma chuan nimin khan Ngentiang Middle School sak thar a hawng a, hmasawnna hna thawhna leh sorkar hmalaknate thláwp zel turin mipui a sáwm. Ngentiang M/S hi PMAAGY aṭanga hmuh cheng nuai 20.23 hmangin VC enkawlna hnuaiah sak a ni.

MUP in hawng

Minister Lalruatkima chuan nimin khan a bial chhunga MUP, Dinthar Branch in thar a hawng. Minister chuan, Mizoram statistics enin Mizo mipate an ṭan a ngai tih sawiin, "Fa neih tam kan inzirtir thar leh a ngai a, chu chu kan hnam damna tur a ni," a ti. MUP in hi MLA fund Rs 13,50,000 leh mi thawhkhawm Rs 7,90,000 hmanga sak a ni.