Lumpsum grant tihpun a ni - Tawnluia

Deputy chief minister Tawnluia chuan nimin khan a bial chhunga Khawzawl Higher Secondary School-ah science leh commerce zirna hmun leh District Urban Development Officer pisa thar a hawng a; lumpsum grant-in-aid ṭanpuina tihpun a nih thu a sawi.

Tawnluia chuan, Khawzawl HSS sorkarin a la ta chu zirlaite leh zirtirtute a lawmpui thu a sawi a, "Cabinet meeting hnuhnung berah Mizorama sikul 311 chu dinhmun ṭha zawkah sorkarin a hláng kai a, Khawzawl district-ah pawh sikul 15 hlàn kai a ni. Sorkarin lumpsum-a sikul a puihna tihsan a ni a, category A-in Rs 6,00,000, category B-in Rs 4,00,000 leh category C-in Rs 2,50,000 an dawng tawh dawn," a ti.

Khawzawl HSS building hi cheng nuai 244.4 sénga sak a ni a; science & commerce zirna hmun panna kawng siam nan MLA fund Rs 5,00,000 hman a ni. Khawzawl HSS science zirna chu kum 2016-a din niin, commerce zirna chu kum 2019-ah din a ni a; zirlai 51 leh zirtirtu 11 an awm mek a ni.

Khawzawl Zaingen Venga UDPA pisa a hawnnaah Tawnluia chuan, "UDPA hnuaiah Khawzawl khawlai chei nan cheng nuai 300 hman a ni tawh," a ti a; UDPA hnuaiah khawpui tana chhenfakawm hmunhma din zel a beisei thu a sawi.

Mizoram State Rural Livelihood Mission Credit Camp neih nghal a ni a, self help group 65-te'n bank branch panga aṭangin loan Rs 2,32,40,000 an la. Khawzawl RD Block hnuaiah khaw 26 a awm a, SHG 400 awmin, member 3,448 an awm mek a ni.