Minister-in aieng sawngbawlna a hawng

Minister of state TJ Lalnuntluanga chuan nimin khan Champhaia Horticulture office leh Tlangsamah aieng sawngbawlna, Turmeric Processing Unit a hawng.

Turmeric Processing Unit, Tlangsam hi SASCI 2020-21 sum nuai 103 sênga din a ni a, civil work bik atan cheng nuai 52.58 ruahman a ni. Khawl hian vawi khatah aieng kg. 200-300 vel a sil fai thei a, darkar khat chhungin kg. 300 a zai lép thei. Aieng her dipnain darkar khatah kg. 100-140 inkar a her thei a, darkar khat chhungin pack 1,200-1,800 inkar fûn theih a ni.

TJ Lalnuntluanga chuan, "Turmeric Processing Unit, Tlangsam Winery leh tuna ruahman tum mek Passion Fruit Processing unit-te hi kut hnathawktute'n eizawnna ngêlnghet zawk an neih theihna tur leh an thar chhuahte anmahni ngeiin an sâwngbàwl a, an hlawk zawkna tura sorkarin a ruahman a ni," a ti.

Ramngaw leh nungchate humhalh chunga hmalak a ṭul thu sawiin Minister chuan, "Kum tina lo kan neih kan bànsan tial tial a, huan nghet kan uar zel a ṭul. Hei hi sorkar policy pawimawh tak a ni," a ti a; Mizoram economy hmasawn zel nan ngaihtuahna zau tak nei turin sorkar official-te a chah.