Tar pension kan tipung dawn - ZPM MLA

ZPM MLA C Lalsawivunga chuan, ZPM party-in sorkarna an chang a nih chuan tar pension (old age pension) Rs 1,000-ah an tihpun dawn thu a sawi.

C Lalsawivunga hian nimina Bethlehem Veng leh Bethlehem Vengthlanga Upa Pawl Ni a hmanpuinaah thu sawiin, sorkar laipuiin kum upate a ngai pawimawh a, old age pension scheme a kalpui tih a sawi a, "Chu chu state sorkarin Rs 50-100 velin a lo puibàwm ve a, chu pawh a hun takah kan dawng thei ṭhin lo. Pathian leh mipui zarah ZPM a sorkar a nih chuan old age pension hi budget aṭangin Rs 1,000-ah tihpun a ni dawn," a ti.

Mizo pi leh pu te, upate'n an tu leh fate leh khawtlang tán sûlhnu ṭha leh hmasawnna an hnutchhiahte chu ropui a tih thu a sawi rualin Lalsawivunga chuan, "Ruihhloin min tibuai a, heng hi chhungkuaa seilian vekte aṭanga chhuak a ni. Ngaihthlak hrehawm khawpin media-ah eirûkna thu leh hla kan hmu ṭhin a, eirukna pawh chhungkuaa seiliante aṭanga chhuak tho a ni," a ti a; khawtlang, ram leh ṭhalaite siamṭhat kawngah theihtawp chhuahpui turin MUP member-te a sáwm.

C Lalsawivunga hian MLA fund aṭangin Bethlem Veng MUP hnenah combo sound system leh microphone a pe a; Bethlehem Vengthlang MUP hnenah MUP In sakna tur Rs 3,00,000 a pe tawh bawk.