Dinhmun ṭha zawka sikul dah politics-a hamṭhatna hmuh tum vang a ni lo - Chhantea

School Education minister Lalchhandama Ralte chuan nimin khan Darlawn leh East Phaileng khuaah sikul sak thar pathum a hawng a; sikul 180 sorkar sikula dah leh sikul dangte dinhmun sang zawka dah chu politics-a hamṭhatna atana hman an tum vang a ni lo niin a sawi.

Minister-in sikul sak thar a hawnte chu - East Phailenga Primary School-II leh Samagra Shiksha Higher Secondary School Arts stream leh, Darlawna Samagra Shiksha Higher Secondary School (Science stream)-te a ni.

Samagra Shiksha HSS, Darlawn Science building hawnna inkhawmah Lalchhandama Ralte chuan, "Mizoram sorkarin sikul 180 zet sorkar sikulah a hláng kai a, adhoc aided leh lumpsum-a dah tharte nen sikul 300 zet dinhmun ṭhaah an ding ta. Sorkar hian kum 2021-ah he hmasawnna hi thlen a tum tawh a, hripui vangin a khawtlai ta mai zawk a, politics-a hamṭhatna atana hman tum vang a ni lo," a ti.

Education Minister chuan, thim ata ênga hruai chhuak turin Pathian thu tih lohah zirna a pawimawh ber tih sawiin, "Technical lama hna ṭha leh sang thawk turin science thiam a ngai," a ti a, Darlawnah science zirna a awm ta chu a lawm thu a sawi.

Minister chuan, Mizoram sorkarin Mizo ṭawng tihhmasawn, humhalh leh tihzahawm zel a tum tih sawiin, "MPSC-in hna a lakah Mizo ṭawng an thiam leh thiam loh en nan Mizo ṭawng middle school standard exam buatsaih a ni tawh dawn," a ti.

Samagra Shiksha state project director Lalhmachhuana sawi danin, East Phaileng P/S-II chu NABARD aṭanga sum pûk hmanga sak a ni a; Darlawn leh East Phailenga Samagra HSS-te chu Samagra Shiksha sum hmanga sak a ni.