August 17 aṭangin UG leh PG exam

Mizoram University chuan a hnuaia under graduate (UG) even semester final exam chu August 17, 2020 aṭangin buatsaih tum a nih thu a puang a, college zirtirtute leh zirlaite chu exam atan inbuatsaih turin a chah.

MZU chuan nimin khan hriattirna tichhuakin, offline (pen & paper) exam buatsaih tum a nih thu a tarlang a, ram dinhmunin a zir loh avanga offline exam kalpui theih a nih loh chuan, kal zel dan tur la ngaihtuah zel tur a nih thu a tarlang bawk.

Ruahmanna hmasa, August 10-a ṭan tur anga exam routine an siama August 10-14 chhunga exam tura lo tih tawh subject-te chu tuna routine awm sa exam zawh hun, September 3, 2020 hnu lamah exam tur niin, exam hun tur siamṭhat chu college tinah thawn a ni ang.

MZU controller of examination Prof. Lal­nuntluanga chuan Vanglaini palai zawhna chhangin, August 10 aṭang khan MCA leh BCA chu an exam ṭan tawh tih sawiin, "Harsatna a awm lo a, ṭha takin exam a kal thei," an ti a; post graduate exam pawh August 17-ah ṭan tur a nih thu a sawi.