SEDP hnuaia mau/raw chìn thlangte'n an chíng ṭan tawh
Socio Economic Development Programme (SEDP) hnuaia Lengpui leh Hmunpui khuaa mau/rua chìn thlangtute chuan an chíng ṭan tawh. Hetih lai hian, mau/rua chî an dawn zingah nung zo lo a awm nual.
Lengpui Bamboo Society (LBS) hruaitute hnen aṭanga Vanglaini thu dawn danin, mau chìnna tur unit khat (buh ṭin hnih leh a chanve hmun) zelah mau chi 400 pek an ni a, mahse, 400 chu unit khatah a tâwt deuh. Horticulture department lamin mau chìn dan tur an hrilh angin an chíng a, department-in kum thum chhung an enkawlpui dawn.
Mau chìn thlangtute chuan mau chi bakah, thlám sakna, mangkhawhna, hlo thlawhna, lo vahna, etc. atan Rs. 80,000 vel an dawng tawh a ni. LBS hruaitute chuan, mau chi an phun zawng zawng a nun vek loh thu sawiin, "Mau chi kan dawn hi a intiat vek lo a, ṭhenkhat chu a len tawh deuh avangin tan ṭhen ngaite a awm. Chu bakah, department lamin khur min laihtir lian lutuk a, kan phun leh har si avangin a hnawh khat turin leivûngin a daih tawh lo. Chu'ngte chu a nung lo a awm chhanah kan ngai," an ti.
Mau puitlin hun tur an hriat bik loh thu sawiin LBS hruaitute chuan, "Department lamin kum thum chhung min enkawlpui a tum a, chumi chhung chuan a puitling hman turah an ngai a nih kan ring," an ti a; a hralhna lamah chuan hriat an neih bik loh thu an sawi a ni.