Kan sorkar chuan Old Pension Scheme hman kan tum - Lalsawta

Mizoram Pradesh Congress Committee (MPCC) president Lalsawta chuan, kumina MLA inthlanpuiah Congress party-in sorkarna an siam chuan sorkar hnathawkte tan Old Pension Scheme hman leh an tum thu leh, ZPM party-in Indian National Developmental Inclusive Alliance (INDIA) an thawhpui theih loh thu a sawi.

Lalsawta hian nimin han Aizawl Press Club-ah thuthar thehdarhtute a kâwm a; sorkarna an siam chuan sorkar hnathawkte tan Old Pension Scheme hman leh an tum thu sawiin, "Old Pension Scheme hian ṭhat tâwk lohna leh sorkar sum a heh tih hre mah ila, sorkar hnathawkte hi kan duhsak a ni. A ṭul chuan Mizoram hian Mizoram Pension Rules pawh kan siam a ngai mai thei," a ti.

India ramin zalenna a hmuh aṭanga tun thlengin BJP sorkar vanga hun khirh leh thim India mipuiin an la hmachhawn ngai lo nia sawiin Lalsawta chuan, "MP an ngah avangin dan hlauhawm tak tak an siam tawh a, an hmalakna hi India ram tan a hlauhawm tih hriain political party 26 chu intélkhawmin, INDIA an din a, INDIA hian vote vbc. 65 an nei tling a, BJP hian vote vbc. 23 chauh an nei," a ti a; INDIA chuan central-ah sorkarna an chang ngei dawnin a lang niin a sawi.

MPCC President chuan, Congress party-in INDIA an thawhpui theih laiin ZPM party-in an thawhpui thei lo tih a sawi a, "BJP chu MNF ang bawkin inthlahrung tak leh Mizoram mipui mitmei veng chungin an thawhpui thei mahna," a ti.

ZPM-in INDIA an thawhpui theih loh chhan zawhna chhangin Lalsawta chuan, "Congress kan awm a lawm. Congress kan awmte chuan engtin nge ZPM-in an thawhpui theih ang. BJP an thawhpui theih dan tur chu Pu Duhoma pawhin a sawi kha, 'Mizorama BJP-te chu kan kal kân daih mai ang' a tih kha. Tunah pawh Mizoramah BJP an awm reng a, MNF chuan anni thlawh khûmin central-ah an thawhpui," a ti a; ZPM-in MPCC thlawh khûmin INDIA an zawm dawn lo niin a sawi.

Congress President chuan, BJP hnâwl turin Mizoram mipui a sáwm a; sorkarna an siam chuan dan angin restricted tender an kalpui dawn thu te, kumin inthlanpui atan uluk taka MLA candidate tur an inruat thute a sawi a, Congress Legislature Party leader ni mek Zodintluanga Ralte nen thawhhona ṭha tak an nei mek niin a sawi bawk.