Tlâkpui kumah Pathianin min hum dawn pawh a ni mai thei - Rinliana Sailo

MNF MLA Lalrinliana Sailo, Assembly speaker chuan, kumin MLA inthlanpui awm turah MNF ticket a chang tawh dawn lo a, a bial Chalfilha ding tur MNF party-in an thlang tawh. Speaker chuan, tlâkpui kumah Pathianin a hum dawn a nih mai theih thu a sawi.

Vanglaini palai zawhna chhangin Lalrinliana Sailo chuan, "Seat ka chang ta lo tur chu rilru a na ve deuh. Mahse, kum 2019 khan MNF vice president pakhatin Congress MLA bulah thil sawi a nei a, chumi vang chuan seat ka chan loah pawh ngaihdan chin ka nei. Tlâkpui kumah Pathianin min hum dawn pawh a ni mai thei," a ti.

Lalrinliana Sailo chuan, MNF a chhuahsan dawn leh dawn loah ngaihdan a la neih loh thu sawiin, "Independent candidate nih erawh ka tum lo. MNF ticket-in ding leh ila chuan Pathian leh mipui zarah ka tling leh ngeiin ka ring," a ti a, Chalfilh bial mipui nen an inngaina tak zet niin a sawi.

Lalrinliana Sailo chuan, a bial tan theihtawp a chhuah vea a inhriat thu sawiin, "Kan bial kan vanduai a, ruang pawh 260 chuang Aizawl aṭangin kan bialah kan thawn tawh. Kan bial hi ngaihsak bik ngai kan ni a, he biala MLA ka ni tawh lo tur chu ka ngaihtuah khawp mai," a ti.