MLA aṭangin KT Rokhaw a báng; MNF candidate a ni dawn

Kum 2018 MLA inthlana Palak bial aṭanga Congress ticket-a MLA atana thlan tlin KT Rokhaw chuan nimin khan Assembly speaker Lalrinliana Sailo hnenah MLA aṭanga bànna a thehlut a; kumina inthlan­puiah Palak bialah MNF candidate a ni dawn.

MLA aṭanga bànna a thehluh zawha thuthar thehdarhtute zawhna chhángin KT Rokhaw chuan, MNF hruaitute'n an bial an zir chiang a, an hre chiang hle niin a sawi a, "Mi ṭha zawk leh fel tak tak an awm laiin, an party ticket-a ding turin min sawm a ni. Mahse, MLA chu mipui thlan tlin kan nih angin keima thu maiin thutlukna ka siam thei lo," a ti.

KT Rokhaw chuan, a bialah kalin, mipui a ràwn phawt tur thu MNF hruaitute a hrilh tih sawiin, "Kan bial chhung khaw hrang hrang ka tlawh kim deuh vek a, khaw tina Congress party leh MNF hruaitute ka be ráwn vek a ni," a ti a; khaw hrang hranga ngaihdan a lak hnuah an duh dan angin MNF a zawm ta niin a sawi.

KT Rokhaw hi Palak bialah ṭum thum MLA atana thlan tlin a ni tawh a, kumina inthlanpuiah MNF ticket-in a ding dawn.

MNF-in an candidate turte vawiinah an puan tawh dawn avang leh an party-in bàn loa party-a a inleh chuan MLA atana bàn theih a nih avangin MLA aṭanga bànna a thehlut a ni.