Reiek Tourist Resort sawifiah turin Lokayukta-in Tourism dept. a hriattir

Mizoram Lokayukta chuan Reiek Tourist Resort tihchangtlunnaah sum eirûkna a awma hriat a nih avanga complaint an dawn chungchang sawifiah turin Tourism department a hriattir.

ZPM Ṭhalai chuan Reiek Tourist Resort tihhmasawnna atana sum ruahman nuai 680 chuang chu mi ṭhenkhatin sum siamna atan an hmanga an hriat avang leh sum hman leh hnathawh danah dik lo a awma an hriat avangin chhui tura ngenna July 18, 2023 khan Lokayukta-ah an thehlut a ni.

Lokayukta chuan ZPM Ṭhalaite ngenna chu a zir chian hnuah ZPM Ṭhalaite'n thil dik lo awm nia an hriatte sawifiah turin a kaihhnawih depart­ment - Tourism department chu August 1, 2023 khan lehkha hmangin a hriattir a ni.

Tourism depart­ment hian sawifiahna Lokayukta-ah an la thawn lo a, an thawn hunah zir chian a ni ang a, kalpui zel dan turah thutlukna siam a ni ang.