Court thutlukna khing lêt lo turin CM-in Education Secretary a hrilh

SSA hnuaia zirtirtute sorkara an ngheh theihna tura High Court-in thutlukna a siam tawh, Mizoram sorkarin court sang zawka khin lêt a tumna chu khing lêt lo turin Chief minister Zoramthanga'n School Education Secretary a hrilh.

Mizoram SSA Teachers Association (MSSTA) thuchhuah tarlan danin, MSSTA hruaitute chuan nimin khan Chief Minister an kâwm a, "Court appeal chungchanga biak tur ṭulte a be nghal a, MSSTA ngenna angin Chief Minister hian sorkarin kan court judgement appeal tura thu a tihtluk tawh chu appeal lo turin Education Secretary chu phone-in a hrilh nghal a, lawmawm kan ti hle," an ti.

CM Zoramthanga hian CSS hnuaia thawkte tana Special Regularisation Scheme siam mek chungchang a sawifiah a, MSSTA-te chungchanga High Court judgement chu scheme siamna kawnga tihuaisentu leh remchang siamtu a nih thu a sawi niin MSSTA chuan an tarlang bawk.