Hnam dang pasal neite’n Assembly-a ṭhut an tum hi kan dodal dawn - MZP President

MZP president thar H Lalthianghlima chuan, hnam dang kawppui neite’n Assembly House-ah ṭhut tuma hma an la chu MZP-in pawi an tih thu sawiin, ram leh hnam him nan theihtawpa an dodal dawn thu a sawi.

MZP Gen.Hqrs office bearer tharte hnena nimina mawhphurhna hlanna inkhawmah thu sawiin H Lalthianghlima chuan, "Mizo hmeichhiate'n hnam dang pasal an nei hi ṭha kan tih loh thu nasa takin kan tlangaupui ṭhin. Hnam dang kawppui neite’n tun hnaiah ram rorelna sang Assembly House-ah ṭhut tumin hma an la hi pawi kan ti a, kan ram leh hnam him nan theihtawpin kan dodal dawn. Hnam dang kawppui neite pawh Mizo hnam hmangaih vangin ram rorelna sang berah hmun chan tum kher lo turin kan ngen a ni," a ti.

MZP President chuan, "Ram leh hnam leh zirlaite tana ṭha turah chuan huai takin kan kal dawn," tiin, an kal dan turah thuràwn an dawnsawn theih thu a sawi a; Mizo ṭhalaite all India service leh central service-a tling an tlem chhan chu kum tin state service lak a nih ṭhin vang a ni pakhat tih sawiin, "Kum tina state service (MCS) lak ṭhin hi khát deuh zawk emaw, ṭum khatah tlem tê têa la turin Mizoram sorkar kan ngen a ni,” a ti bawk.

MZP Gen.Hqrs hruaitute mawh­phurhna inhlanna inkhawm hi MZP Pisapuiah buatsaih a ni a; vice president thar chu C Lalremruata niin, general secretary thar chu Chinkhanmanga Thomte a ni.