MNF-in an candidate tur an tifel Speaker leh HM an ding dawn lo

MNF party chuan kumina MLA General Election awm tura an candidate turte an tifel a, kum 2018 MLA inthlana an party ticket-a thlan tling zinga pathum chu MNF ticket-in an ding tawh dawn lo.

MNF hian hun eng emaw chen an tihfel theih loh bial pahnih - Chalfilh leh Tuichawng biala ding tur an tifel tawh. Assembly Speaker ni lai Lalrinliana Sailo chu a bial Chalfilha ding turin an thlang nawn lo a, a aia ding turin K Lalhmangaiha, ITI Veng an ruat.

Tuichawng biala an candidate tur chu Rashik Mohan Chakma a ni. RM Chakma hian CADC MDC dangte nen September 29, 2023 khan MNF aṭanga bànna a thehlut a, a hnu ni thumna, October 2, 2023 khan MNF-ah lêt lehin, MNF MLA candidate a ni dawn a ni.

Home minister Lalchamliana'n ṭhangthar zawkte a ken theih thu a sawi hnuah a bial Hrangturzo constituency-a ding turin mi dang ruat a ni a; mahse, MNF hruaitute chuan Lalchamliana hi Chalfilh biala ding turin an sáwm leh a, chhungkua an inràwn khawm hnuah a pawm lo a ni.

Hetih lai hian, kum 2018-a Siaha biala MNF ticket-a thlan tlin Dr K Beichhua chu MNF aṭanga bàn a nih tawh avangin MNF chuan candidate atan MADC MDC ni lai HC Lalmalsawma Zasai an ruat.

MNF party hian vawiin chawhma dar 11 hian kumin MLA inthlanpuia an party candidate tur an puang dawn a, MNF president Zoramthanga'n campaign a hawng nghal ang.