Voluntary Blood Donation Day hmang

Nimin khan Mizoram hmun hrang hrangah National Voluntary Blood Donation Day (October 1) hman a ni a, Day pualin thisen pek huaihawt a ni.

National Voluntary Blood Donation Day hi Aizawlah chuan Mizoram State AIDS Control Society (MSACS) leh Association for Voluntary Blood Donation (AVBD) huaihawtin Dawrpui Multipurpose Hall-ah hman a ni a; ZMC-a assistant professor Dr Sangzuala'n thisen pe turte tana nunphung hrisel neih dan tur a sawi.

MSACS assistant director F Lalmuanpuii'n a thlawna thisen pek (voluntary blood donation) chungchang a sawi a, MSACS joint director Dr Richard CLR Hluna leh Synod Hospital-a consultant Dr Lalchhanhima ten HIV/AIDS chungchang an sawi bawk.

National Voluntary Blood Donation Day hi district dangah pawh hman a ni a, a thlawna thisen pek pawimawhna bakah, HIV/AIDS chung­chang inzirtirna kalpui a ni.

Siahaah chuan thisen pek buatsaih nghal niin, mi 10-in thisen an pe a, thisen petute chu ECM Higher Secondary School leh Don Bosco School zirlaite an ni.

National Voluntary Blood Donation Day hi kum 1975 aṭangin October 1-ah hman ṭhin a ni a, kum tin thupui thlan niin, kumina thupui chu 'Give blood, give plasma, share life, share often' tih a ni. Kuminah hian Pathianniah a tlâk avangin nimin khan hman a ni.