KHAWTHLIR

Wildlife Week

National Wildlife Week vawi 69-na pualin nimin khan J Buana College, Lungleiah hun hman a ni a; Lunglei district forest officer PC Lalchhandama'n zirlaite hnenah nungchate leh an chenna ramngaw pawimawhna leh mihringte nena inlaichinna te, mihringte dam khawchhuahna atana an pawimawhnate a zirtir.

Inthlan inbuatsaih

Kumina MLA inthlanpui awm tura inbuatsaihna kal zelah nimin khan Serchhip District Election Officer hoin Serchhip DC meeting hall-ah nodal officer-te tan training buatsaih a ni. Serchhip district-ah hian Assembly constituency pathum a awm a, DEO tiamin nodal officer 13 ruat a ni.

Minister-in hmanpui

Minister K Lalrinliana chuan nimin khan Kolasib-a Parish Hall-ah C Zakhuma Higher Secondary School Annual Sports vawi 23-na khârna a hmanpui a, lawmman hrang hrang a sem. CZ HSS hi kum 1999-ah din a ni a, zirlai 286 an awm mek a ni.

Phûllem phah dawn

Minister Lalchhandama Ralte chuan, Mizoram hmar tlángdung mipuite'n infiamna lama hma an sawn theih nan Darlawn football ground-ah phûllem phah a nih dawn thu a sawi. Lalchhandama Ralte hian nimin khan Ṭinghmun VC-in 7th Tuivawl MLA Cup champion an nih an lawmna a hmanpuinaah thu sawiin, "Hmar tlangdung tan infiamna lama hmasawn zel nan Darlawn football ground-ah grass phah a ni dawn a, cheng nuai 200 sanction a ni tawh," a ti.

Pisa thar hawng

Social Welfare & Tribal Affairs minister Lalrinawma chuan nimin khan Serchhip Bukpuiah District Social Welfare Officer pisa leh Women & Child Development directorate hnuaia District Programme Officer pisa thar a hawng. Lalrinawma chuan, kum upate ṭanpuina (old age pension) sum a bahlah leh zauh ṭhin chu sorkar laipuiin inkaihhruaina a siam danglam vang a nih thu a sawi.