National Wildlife Week hawn a ni

Environment, Forests & Climate Change (EFCC) minister TJ Lalnuntluanga chuan nimin khan Champhai Bethel Venga EFCC Complex-ah nungchate humhalh hapta, National Wildlife Week vawi 69-na hawng. Week thupui chu 'Partnerships for wildlife conservation' (Nungcha humhalh kawnga thawhhona) tih a ni.

TJ Lalnuntluanga chuan, Mizoram pum tan National Wildlife Week 2023 a hawng tih sawiin, "Hapta hian Mizoram mipui thinlungah hna thawk tharin, ramngaw leh nungcha humhalhnaah mi tinin mawhphurhna kan nei ṭheuh a ni tih min hriat thartirtu nise ka duh. Leilung hausakna, thing leh maute kan tichereu nasa a, chuvangin, ram kan tihchhiat leh chumi vanga boruak, sik leh sa danglam nasa lutuk venga siamṭha leh turin theihtawpa ṭan kan lak a ṭul," a ti.

Mizoramin hmasawnna kawng a zawh mekah environment humhalhna nen kalkawptir a ṭul thu sawiin Minister chuan, "Hei hi EFCC department thil tum a ni a, hnam hmangaihna, nationalism thinglung nen pawh a kal kawp tlat a ni," a ti a; ramngaw leh nungcha humhalh pawimawhzia hretu mai ni lo a, nunpuitu nih tum ṭheuh turin Mizo mipui a sáwm.

Hapta hawnna inkhawmah hian Champhai district-a sorkar hotu te, MJA hruaitu te, VC, YMA, MUP, MHIP, MZP, Champhai Nature Conservancy aiawhte leh zirlaite an tel.

National Wildlife Week 2023 hi October 2-8 chhung hman tur a ni a, India hnampa Mahatma Gandhi pian champha pualin India ramah kum tin hman ṭhin a ni.