Tualte tomato sâwngbàwlna hawn a ni

Deputy chief minister Tawnluia chuan nimin khan a bial chhunga Tualte Tomato Processing Unit din thar a hawng a; tomato chíngtute chu theihtawp chhuaha hma la zel turin a fuih.

Khawzawla Horticulture officer Lalnunpuia tarlan danin, Tualte Tomato Processing Unit dinna atan SEDP aṭangin cheng nuai 50 hmuh a ni a, April 21, 2023-ah a hmun laih hna thawh ṭan a ni.

Tomato sâwngbàwlna khawl - tomato ketchup line chu cheng nuai 40 man niin, FOCUS (IFAD) aṭanga lei a ni a, a bunna tur in sq.m. 108-a zau sak a ni. Ketchup line hian darkar khatah tomato kg. 100 vel a sâwngbâwl thei tura ngaih a ni. Kawlphetha lak luhna leh thil dangte siam a ni bawk.

Tawnluia chuan, bazara tomato zawrh mai bakah, sâwngbâwlna tur bun a ni ta leh vawnṭhat theih a ni dawn ta chu lawmawm a tih thu a sawi a, "Tualte khuain ruahtui tlak mumal loh kumah pawh cheng nuai 200 chuang man tomato an thar chhuak thei hi thil lawmawm tak a ni," a ti.

Tualte khua hian kum 2019-ah tomato an chíng ṭan a, tomato chi hnih - Arka Samrat leh Arka Abhed chíngin, chhungkua 200 chuangin eizawn nan tomato hi an hmang mek. Kumin hian September thla thlengin cheng nuai 200 vel man tomato an hralh tawh a; kum 2019-2023 chhungin tomato aṭangin cheng nuai 1,193 chuang an la lut tawh a ni.