Satellite Wildlife Rescue Centre lungphum phum

Tlangsam rama Dum Tlangah Environment, Forest & Climate Change (EFCC) minister TJ Lalnuntluanga chuan nimin khan dan loa ramsa tawlh rûk mante leh ramsa chhanchhuahte enkawlna tura ruahman, Satellite Wildlife Rescue Centre of Aizawl Zoo din tur lungphùm a phûm.

Satellite Wildlife Rescue Centre hi sorkar laipuia Ministry of Environment, Forest & Climate Change hnuaia Central Zoo Authority sum cheng nuai 1,091 hmanga siam tur niin, ram hectare 20-a zauah ruahman a ni a; ramsa chi hrang hrangte a hrana dahna tur hmun ruahman vek tur a ni.

TJ Lalnuntluanga chuan, India rama Forest minister-te inhmuh khawmnaah dan loa ramsa tawlhrûk mante leh ramsa chhanchhuahte enkawl zuiah Mizoramin harsatna a tawh ṭhin thu a thlen tih a sawii a, "Sorkar laipuia Forest Minister leh a thawhpuite'n an ngai pawimawh a, Central Zoo Authority sum cheng vbc. 10.91 ruahman niin, instalment hniha sum lo lut tur a ni. Cheng vbc. 5 release tawh a ni a, hna bul ṭan mek a ni," a ti.

EFCC department field staff indaih lohna vanga duh anga hmalaknate a chak theih loh ṭhin thu sorkar laipuiah an thlen tih sawiin Minister chuan, "Nungchate venghim turin wildlife protection squad mi 50 lak sorkar laipuiin a phal a, lak a ni tawh. Champhaiah Nature Learning Centre, Botanical Garden, Mini Zoological Garden leh Nagar Van din mek a ni," a ti. Forest department thil tumte tihlawhtling tur leh an thâ tichak turin mipui thlâwpna leh thawhpuina an mamawh thu a sawi bawk.