Home Minister-in 2018-23 chhunga Home dept. hlawhtlinna a tlangzarh

Home minister Lalchamliana chuan nimin khan Taxation auditorium-ah kum 2018-2023 chhunga Home department hlawhtlinna hrang hrang tarlanna, Achievement Report bu a tlangzarh.

Home Minister chuan, a department enkawl secretariat leh directorate lama official ṭha tak tak zarah a mawi ve mai tih sawiin, "Thinlung takin department hnuaia thawk zawng zawng chungah lawmthu ka sawi. Home department hi tuifinriat ang deuha thil engkim luan khawmna a ni chungin, thawktute zarah kan hmazawna thil awm kan tifel thei zel hi hlawhtlinna ropui tak a ni," a ti.

Hripui léng vanga police recruitment tih theih a ni rih lo chu pawi a tih thu sawiin Lalchamliana chuan, "Compassionate ground hnuaiah erawh mi eng emaw zat lak a ni a, a lawmawm," a ti a; Mizoram Police-ah mi ṭha tak tak an awm theih nan theihtawp chhuah zel a nih thu a sawi.

Mizoram chu state naupang a nih thu sawiin Minister chuan, "Revenue lâkah kan la pachhia a, chuvangin, central zài ngai chunga kan kal a ngai a, state lian zawk nen tehkhin rual kan ni lo nãin, theihtawp erawh kan chhuah vel zel a ni," a ti.

Home additional secretary Joseph Lalramsanga chuan, Achievement Report an buatsaih dante a tarlang. A sawi danin, Home department hnuaia directorate hrang hrang Forensic Science Laboratory, Sainik Welfare & Resettlement, Mizoram Home Guards & Civil Defence, Prisons, Fire & Emergency Services bakah, Police Headquarters aṭangin an hnathawh leh hmalaknate lehkhabuah tarlan a ni.