MZU Psychology dept. ruby jubilee lawm

Mizoram University-a Psychology department chuan nimin khan MZU Auditorium-ah kum 40 an tlinna, ruby jubilee an lawm a, Governor Dr Hari Babu Kambhampati, MZU chief rector ni bawkin a hmanpui.

Governor chuan, khawvel hmasawn zelah mipui rilru sûkthlêk dante a hrisel zawnga kaihhruai kawngah leh rilru lama harsatna neite enkawl kawngah psychology pawimawhzia mipuiin an hre chho mek tih a sawi a, "Taksa hriselna a pawimawh tlukin rilru hrisel a pawimawh," a ti.

Dr Hari Babu Kam­bhampati chuan, MZU Psychology department-in clinical psychology zirtir phalna thuneitu sang hnen aṭanga an hmu chu a lawmpui thu a sawi a; clinical psychology zirtirna kalpui a nih chuan Psychology department-in khawtlang nun leh inkaihhruaina kawngah chak zawkin thâ an thawh theih a beisei thu a sawi bawk.

MZU vice chancellor Prof. Dibakar Chandra Deka pawhin thu sawiin, "Khawvel danglam zel kara khawtlang nun danglamah zelah psychology thiamna mamawhna a nasa tial tial. Hmasawnna ringawt nei ila, rilru hrisel lo leh mihring mihrinna hloh kan nih si chuan kan tan thil ṭha a ni thei lo," a ti.