BDO pisa leh quarters thar hawng

Rural Development minister Lalruatkima chuan nimin khan Kawrtethawveng BDO pisa leh quarters sak thar a hawng. Minister of state Robert Romawia Royte-in Kawrtethawveng Village Knowledge Center sakna tur lungphùm a phúm bawk.

Lalruatkima chuan, Mizo an pung chak lo tih sawiin, "Hnam ang pawhin nakinah harsatna a thlen thei a, ram himna ngaihtuah rengin hnam tan fa hrin manhla ni tura ṭan kan lak zel a ngai. Khawthlang tlangdungah ram leilung hausakna aṭangin eizawnna a tam a, chutiang karah chuan tlangdung dang ang bawkin hmasawnna kan mamawh," a ti a; BDO leh thawktu dangte chu VC-te thuràwn lakna leh ngampa taka an lenna ni tura inhawng taka awm turin a chah.

Robert Romawia Royte chuan, NABARD kaltlanga sak tur Village Knowledge Center chu khaw mipuite'n ṭangkai taka an hman a duhsak thu leh tihchangtlun zel a nih dawn thu a sawi a, "Kawrtethawveng tennis court hi Sport department kaltlangin thuam ṭhata chei thar tum a ni a, khawtlang remtihnain sport item danga hman theih tura her rem dan pawh ngaihtuah a ni dawn," a ti.

Kawrtethawveng RD Block hi January 20, 2023 khan hawn a ni a, BDO pisa hi MGNREGS leh MzSLRM hnuaiah sum nuai 195.75 sênga sak niin, BDO quarters chu cheng nuai 98.24 senga sak a ni. In pahnih hi Kawrtethawveng RD Block-in an sa a ni.