MADC MDC by-election-ah MNF party candidate a tling
September 29, 2023-a Mara Autonomous District Council (MADC)-a Siaha East-I biala MDC by-election neiha vote tlate chu nimin khan Siahaah chhiar a ni a, MNF candidate Nelson Khenglawt a tling.
By-election-ah hian candidate pali an awm a, vote 2,093 a tla. Vote tlate chu nimin chawhma dar 11 aṭang khan Siaha DRDO Conference Hall-ah chhiar a ni. MNF candidate Nelson Khenglawt-in vote 1,000 hmuin, thlan tlin a ni a; amah hnaih bertu ZPM candidate Tlanzara Hranglung chu vote 347-in a hneh. Nelson Khenglawt hnenah hian returning officer Lalhmunsanga Hnamte, Siaha DEO chuan Certificate of Election a hlan a ni.
MADC Siaha East-I bialah hian MDC ni lai a thih avangin by-election buatsaih a ni.
MNF party chuan thuchhuah siamin, MADC-ah BJP party kaihhruai rorelna hnuaia Siaha East-I biala MNF an chak chu lawmawm an tih thu an tarlang a, "He bial mai ni lo, Siaha bial chhunga MNF dinhmun ṭhatzia a pho lang hleah kan ngai a, MNF sorkarin ram tana a thawh nasatzia leh mipuiin rinna an nghahzia a tilang hleah kan ngai," an ti a; MLA inthlanpui awm turah pawh hnehna sang tak an chan ngei an rin tlat thu an tarlang bawk.
VOTE HMUH ZAT
1. Nelson Khenglawt - MNF - 1,000
2. Tlanzara Hranglung - ZPM - 653
3. F Lallawmawma - INC - 324
4. R Lalṭanpuia - BJP - 112
5. NOTA - 4