Lily Vengah chhungkaw 2 aṭangin Hripui vei mi 8 hmuh chhuah a ni

August 11, 2020-a swab sample endikah Covid-19 vei mek frontline worker (police) pakhatin hripui a kai chhàwn nia hriat hripui vei, chhungkaw pahnih aṭangin mi pariat hmuh chhuah a ni a, police awmna veng - Chaltlang Lily Veng LTF chuan nimin aṭang khan total lockdown an puang. LTF hian hripui vei hmuh chhuah tharte'n an kài chhàwn theih tura ngaihte an chhui zui nghal a, nimin khan mi 33-te swab sample lâk nghal a ni.

Chaltlang Lily Veng Local Task Force (LTF) thuchhuakin a tarlan danin, an venga police pakhat, Covid-19 vei tih kar hmasaa hmuh chhuah hi BSF sipai khung hrante dahna (quarantine centre) - NIELIT, Zuangtuia duty a ni a, BSF sipaite aṭanga hripui kai nia hriat a ni. Hripui vei Thawhlehnia hmuh chhuah zingah nausen thla thum mi leh naupang kum 7 mi an tel.

Lily Veng LTF-in hriat tur an tarlan

  Covid-19 +ve police veivahna

1.    August 3-5, 2020 chhungin an chenna inah a haw a, August 5 zanah a riak.

2.    August 6-ah ama taxi hmanga chhuakin, naupang pathum - a fapa, an in hnuaia naupang leh Bawngkawna an ṭhiante nau a phur a, pawisa lak a tumna hmasa ATM-ah a lak theih loh avangin Bawngkawn Police Station bula mini ATM aṭangin a la chhuak.

3.    An in hnuaia naupang (Covid-19 vei tih finfiah tawh) chu August 8 aṭangin Edenthar Venga an chhungte inah a riak.

4.    A pizawn Lily Veng (Sairang road)-a chengte August 3 leh 5-ah tlawhin, facemask a pe a, a tlawh hmasak zawkin a ṭhu khawmuang.

  Police nupui chêt velna

1.    Bawngkawn Bazar leh Thingsul Bazar (Bawngkawn South)-ah August 5 hnu lamah a kal.

2.    August 7-ah Lily Veng Health Sub-Centre-ah naute vaccine an la a, thawktute leh nau pawm dang kal ve an awm nual.

  An fate veivahna

1.    Lily Veng chhunga dawr hrang hrangah eichawp mamawh leiin an kal nual a, ṭhenawm hnaivaia an ṭhiante inah an lêng lut ve hlawm. In neitu (in hnuaia khawsa)-te nen an inkalpawh nasa.

  A kaihhnawih dang

1.    Kepràn khua aṭangin mikhual an nei a, hei vang hian Kepran khuaah lockdown an puang.

2.    Kepràn khuaah chhiat tâwk an awm avangin khaw ṭhenawm aṭanga kal an awm nual. Covid-19 veite mikhual hi Kepràn khuaa chhiat tawhnaah leh ṭhenawmah a kal kual nual. An khaw ṭhenawm Sawleng khuaah lockdown mek a ni.