Capping & Lamp Lighting hun hmang

Mission Fourndation Movement (MFM) School of Nursing chuan nimin khan IPR directorate auditorium-ah Capping & Lamp Lighting Ceremony an hmang a, Aizawl deputy mayor Lalringliana'n a hmanpui.

MFM School of Nursing capping & lamp lighting ceremony-ah hian khuallian Lalringliana bakah, MFM director R Vanlalzauva ten thu an sawi a; TNAI president leh RINPANS principal (nursing) Lalfamkimi kaih-hruaiin zirlaite lukhum khumtirna, bati chhit leh thutiamna hun hman a ni.

MFM School of Nursing principal Christina Zothanpuii sawi danin, MFM hian September 2, 2009-ah School of Nursing dinin, Indian Nursing Council-in a pawmpui a ni a, Auxiliary Nursing & Midwifery zirna kalpui mek a ni. Batch khatah zirlai 20 zel an la a, tun thlengin zirlai 87 an zir chhuak tawh a, principal bakah tutor pangain an enkawl mek. An zirlai chhuak tawh zinga pakua chu missionary nurse-in an chhuak tawh a ni.