Pisa hun tihhma mi ṭhenkhat tan a buaithlak ang - Chief Secretary

Chief secretary Lalmalsawma chuan, sorkar pisa ṭan hun tih hma chu ṭhenkhat tan a buaithlak a rin thu leh, sorkar ni pawimawha sokar hnathawk kal lote chungah action lak a buaithlak thu Vanglaini a hrilh.

Vanglaini palai zawhna chhangin Lalmalsawma chuan, sorkar ni pawimawha sorkar hnathawkte kal tura hriattirna chhuah a nihin, a kal lote chungah action lak a ni lo tih a sawi a, "Attendance lak a nih loh chuan a kal lote hriat theih a ni lo a, attendance lak hi thil buaithlak tak a ni. He thil hi a practical chuan a harsa hle," a ti.

Sorkar pisa ṭan hun tihhma chu sorkar hnathawk ṭhenkhat, hmun hla deuha awmte tan a buaithlak a rin thu sawiin Chief Secretary chuan, "Delhi-ah chuan nipui leh thlasika sorkar pisa kai hun a inang reng a, thlasikah chuan hmun hla deuha awmte an khawngaihthlak hle," a ti.

Lalmalsawma chuan, sorkar hnathawkte'n pisa ṭan huna an thlen leh thlen loh chu endik reng a nih thu sawiin, "A hun taka sorkar hnathawkte'n pisa an kai theihna atan hian theihtawp kan chhuah zel ang," a ti a; ṭan huna pisa thleng lo insawifiah tura hriattirte pawh an neih tawh thu a sawi.

Chief Secretary hian New Secretariat Complex chhunga office-ahte ṭan huna sorkar hnathawk an kal leh kal lohte a enfiah ṭhin a ni.

Lalmalsawma chuan, file-in dawhkân a paltlang tam lutuk chu siam ṭhat hret hret a ni tih sawiin, "Zâwi zâwiin hma kan sawn hret hret a, vawi leh khatah a harsa a, tih phut phut chi pawh a ni lo. A tahtawla kal ngai," a ti a; file khawihtu mihring a inthlak ve zel avangin siam rem zel a ngaih thu a sawi.

Zawhna chhangin Chief Secretary chuan, file-in dawhkan a paltlang tlem avangin hna kalphungin a tawrh phah a rin loh thu a sawi.