Rohluna'n IAS Coaching Centre tur a tlawh

3rd February, 2016

Mizoram Youth Commis-sion (MYC) bultuma IAS Coaching Centre atana chei mek, Dinthar Primary School chu nimin zing khan School Education minister H Rohluna'n a tlawh.

H Rohluna chuan, Mizoṭhalaite zingah lehkha zir peih deuh tura ngaih, a ngaihna hre si lo an tam nia sawiin, "Mahnia bei fat fat peih an tlem ṭhin hle. IAS Coaching Centre din tur hian ṭhalaiteah harh tharna thlenin, IAS eng emaw zat a chher chhuah ngei ka beisei. Assistant exam-a tlate pawh MCS-ahte an tling leh thei a ni tih hria a, ṭhahnemngaihna leh tumruhna nena zir a pawimawh dawn hle," a ti.

Minister ṭawimawmtu par-liamentary secretary (Education) Joseph Lalhimpuia chuan an department-in zirlaite leh ṭhalaite hmakhua a ngaih thu sawiin, "State chhungah chauh ni lo ram pum huap pawha Mizo thalaite’n hna pawimawh an chelh ve theih nan MYC hma laknaa Mizorama IAS Coaching Centre din tur pawh hi a ṭha hle," a ti a, centre din tur hi zirlaite leh ṭhalaite’n ṭangkai taka an hman a, Mizoramin hma a sawnpui ngei a beisei thu a sawi.

MYC chairman T Sang-kunga chuan, IAS Coaching Centre dinna atan School Education department-in hmun a pe chu lawmawm an tih sawiin, "Sikul building hlui luah nghal mai theih tura kan ngaih laiin, rin aiin chei ngai a lo tam avangin tum angin kan peih hma thei lo a ni," a ti a; hmunhma peihfel a nih veleh class ṭan tum a nih thu a sawi.

MYC Chairman sawi danin, IAS Coaching Centre din tur hi India rama ṭha berte zinga mi, Alternative Learning System (ALS) outsource tur a, Excel Classes, Delhi-te nen
ṭang kawpin Staff Selection Commission exam coaching class pawh hawn tel tum a ni.

IAS leh SSC coaching centre atan hian Dinthar P/S-I building chei mek a ni a; VSAT hûnna tur bakah, sikul in a hlui tawh avangin thawm ṭhat niin, páwn lam thâwmin zirlaite a tihbuai lohna turin sound proof-a siam mek a ni.

IAS coaching centre hi kum khat chhung zir (Prelims+Mains+Interview) tur a ni a, course fee chu mi pakhat tan Rs. 80,750 niin, Mizoram sorkarin Rs. 60,000 a tum ang a, Rs. 20,750 chu zirlai tum tur a ni. Course khatah hian seat 100 awm tura ruahman a ni.