MNF-in buhfai harsa ngaihven an phût

MNF party chuan thuchhuah siamin, Mizo-ram khaw hrang hrangah buhfai an neih loh avangin mipui an mangang hle niin an tarlang a, Mizoram sorkar chu buhfaia harsa khuate ngaihven turin an phût.

Farkawn, Khankawn, Thekte leh Thekpui khuate'n chawlhkar hnih chhung an ration quota an dawng tawh lo nia sawiin, MNF thuchhuah chuan buhfai awmna sawifiah turin sorkar a phût a, "Fûr khawchhia leh kawng tlang theih loh thu a awm loh vangin department inthlahdah vang leh FCSCA minister John Rotluangliana’n a vei tâwk loh vangah kan ngai," a ti.

MNF chuan, tun hnaiah vêk Sangau leh a chhehvelah buhfai a thlen mumal loh vanga sorkar insawifiahna media lama puan a nih danah, sorkar inrêlbâwlna mumal loh vang a ni tih a hriat theih niin an sawi a; Biate leh a chhehvel khaw
ṭhenkhatah January 2016 chhungin ration buhfai vawi hnih chiah an sem niin an sawi bawk.

MNF chuan, Sup-ply minister John Rotluangliana'n ration buhfai sem chatlak ṭhin te, kudam ruak khua a hriatte chu sorkar timualphotuah puhin a rang thei ang berin storekeeper-te chu a sawn nghal niin an sawi a, "Supply Minister chet vel dan hi a inlulin thlak hle a, department mualpho vanga thawktute chunga hremna a lek ṭhin hi sim turin kan duh," an ti.

Ration buhfai mipuiin an mamawh ang chin zel (need base)-a pe tura ruahmanna kalpui mek chu ennawn vat turin MNF chuan Supply Minister an phût a; need base-a kalpui vangin khaw tam takah kudam a ruah phah ṭhin niin an sawi.