KHAWTHLIR

Nimin khan State NSS Cell huaihawtin zirna-in hrang hranga NSS volunteer mipa 31 leh hmeichhia pangate'n Aizawl Civil Hospital blood bank-ah thisen unit 36 an pe. Aizawl North College aṭangin unit 15, Hrangbana College aṭangin unit 12, Zirtiri Residential Science College aṭangin unit 7 leh PUC aṭangin unit 2 an pe a ni. Lunglei Electric Veng ṬKP Bial chhunga Go­sen unit pawhin Lunglei Civil Hospital tan thisen unit 17 an pe bawk.

Lunglei District Magis­trate chuan, Lunglei Zotlang huam chhunga awm mek 61 battalion BSF zingah Covid-19 vei mi panga hmuh chhuah a nih avangin, BSF-te awmna leh a chhehvel chu tlawhpawh phal loh hmun, containment zone-ah nimin khan a puang. Containment zone hian BSF main gate chhim lam leh hmar lam main gate (Laipui awmna) inkar a huam a ni.

Nimin khan State Referral Hospital (SRH)-ah Covid-19 vei mi 12 leh rinhlelh thilah mi pahnih dah luh thar a ni. SRH-ah hian hripui vei vangin mi 59 an awm mek a; ICU-ah pakhat, SICU-ah pathum leh Isolation Ward-ah mi 55 an awm. SRH-ZMC Bulletin tarlan danin, ICU-a enkawlin hma a sâwn a, ventilator hmantir a ngai tawh lo. Ward-a awm zingah khawsik leh thaw-hah nasa vak lo nei mi pali an awm a, SICU-a awmte'n harsatna lian tham an nei lo.

Champhai DC Maria CT Zuali chuan thupek chhuahin, Champhai mipui him tlânna atan Champhai khawlaia thil zawrh a khap. Khapna thupek hian licence neite pawh a huam vek a, task force-in bazar bik an siam erawh a huam lo. Thupek hian thla hnih chhung a huam ang.

August 27, 2020-a village council inthlan awm tura first polling officer leh second pol­ling officer-te tan nimin khan Lunglei Convention Centre-ah training buatsaih a ni. He hunah hian vote chhiar dan, inthlan result puan, election paper seal dan leh inthlan kaihhnawiha mawhphurhna hrang hrangte zirho a ni.